Өзбекстан келерки жылдан тарта рак оорусунун бардык түрүн дарылай турган жаңы препарат чыгарып баштайт. Бул тууралуу Podrobno.uz сайты «Rigard Farmsintez» өзбек-латын биргелешкен ишканасынын директору Рустам Нуриддиновго шилтеме берип билдирди.

«Биз дүйнөдө жок ыкма менен дарыны жасоону ойлоп таптык. Ал рак клеткаларына керектүү заттарды жеткирүү мүмкүнчүлүгүн 3-5% дан 95% чейин көбөйтөт. Демек, бул илдеттин көйгөйү чечилди»,- деди Нуриддинов

Анын айтымында, бул дарыны колдонуу менен химеотерапиядан өтүү зарылдыгы жоюлат. "Оорулуу капсула түрүндөгү дары ичип, рак оорусун сасык тумоо сыяктуу дарылайт. Дарылоо мөөнөтү клиникалык сыноолордон кийин билинет",-деп кошумчалады ал.

Канада, Латвия жана Өзбекстандын окумуштуулар тобу препараттын үстүнөн бир нече жылдар бою иштешкен. Дарылар эл аралык патентке ээ. Препарат алдын ала сыноодон ийгиликтүү өткөндүгү айтылууда.