Радикал исламчыл деп шектелип, Карагандада өзүн жардырып жиберген адам Актөбөдөгү окуяларга тиешеси жок. Бул тууралуу Казакстан Улуттук коопсуздук комитетинин башчысы Владимир Жумаканов билдирди.

Анын айтымында, теракт уюштурууга шектелген алты киши кармалган. Алардын бири өзүн өзү жардырып жиберген. Окуя 26-июнь күнү Караганда шаарындагы атайын операция учурунда болгон.

Кармалган жарандар салафий тобун кубаттаган жергиликтүү тургундар болгон. Алар облус аймагында теракт уюштурууну көздөгөн деп шектелүүдө.

Быйыл 5-июнда Актөбө шаарында радикал исламчылар делгендер беш тургунду жана коопсуздук күчтөрүнүн үч өкүлүн мерт кылышкан эле.