Жалал-Абад облустук китепканасында облустагы бир катар район-шаарлардын  китепкана кызматкерлеринин катышуусунда  “Китепкана ишин уюштуруу,  тейлөөнү жакшыртуу,   электрондук китептер менен камсыздоо жана китепкана ишин өнүктүрүүдө өнөктөштөр менен иш алып баруу” аталышында окутуп-үйрөтүү семинары өткөрүлүүдө. Бул тууралуу маалыматты аталган китепкананын жетекчиси Сейилкан Аталиева билдирди.

Анын айтымында, бул өткөрүлүп жаткан семинардын негизги максаты - бүгүнкү күндө облустагы китепканаларда иш алып барып жаткан кызматкерлердин окурмандарды заман талабына ылайык тейлөө сапатын жакшыртуу болуп саналат.

- Азыркы учурда бул окутуп-үйрөтүү семинарына жакынкы район-шаарлардын китепкана кызматкерлери келип окуп жатышат, ал эми алыскы райондорго шартка байланыштуу  биз өзүбүз барып окутабыз. Андан тышкары, бул семинар 23-июлга чейин өткөрүлүп, соңунда облустагы район-шаарлардын китепкана жетекчилери улуттук китепканада бир жумалык тажрыйба алмашуу семинарына катышышат. Бүгүнкү күндө облустагы китепканаларда жалпысынан  368 кызматкер эмгектенет, - дейт С.Аталиева.