Жалал-Абад шаарында республикалык чемпионаттарды жеңип, Азия чемпионаттарына катышууга грек-рим күрөшү боюнча шаар спортсмендери жолдомо алышты. Бул тууралуу маалыматты Жалал-Абад шаардык дене-тарбия жана спорт бөлүмүнүн башчысы Адылбек Бакиров билдирди.

Анын айтымында, грек-рим күрөшү боюнча Бакиров Эрбол, Шералы уулу Темирлан 7-июлдан 10-июлга чейин Тайчунг шаарында өтүүчү өспүрүмдөр арасында Азия чемпионатына катышат. Андан сырткары, Франция мамлекетинин Манго шаарында 27-августтан 2-сентябрга чейин боло турган дүйнө чемпионатына Сулайманов Калыбек катышууга жолдомо алып, даярдыктарды көрүүдө.

“5-июлдан 17-июлга чейин Саха мамлекетинин Якутск шаарында спорттун эркин күрөш түрү боюнча Эл аралык “Дети Азии” оюндарына Рахат уулу Нурсултан катталып, катышууга жолдомо алды. Жалал-Абад шаарында спорттун бокс, грек-рим күрөш, жеңил атлетика, алыш күрөшү, каратэ-до, кикбокс, самбо түрлөрү өнүккөн, -дейт А. Бакиров.

Жалал-Абад шаарында жалпысынан мамлекеттик 2 стадион, 3 балдар, өспүрүмдөр спорт мектеби жана жогорку орто окуу жайларынын 18 типтүү спорт залдары, 26 спорт аянтчалары, жеке менчик 16 кичи фудбол талаасы, заманбап үч спорт залы жайгашып, шаар жарандарын дени сак сергек жашоого үндөп, дене тарбия жана спорт менен машыгуу иштерин алып барат. Шаардагы мамлекеттик спорт мектептерде спорттун түрлөрү боюнча 46 машыктыруучу эки миңге жакын жаш өспүрүмдөрдү спорттун 11 түрү боюнча машыктырып келет.