«Журналисттерди коргоо комитети» (Committee to Protect Journalists, CPJ) түркмөн бийлигин өлкөдөгү көз каранды эмес журналисттерди «куугуктуктоону» токтотууга жана кабарчы Солтан Ачилованын өлкөдөн чыгуусуна салынган тыюуну тез арада алууга чакырды.

«Ачилова өңдүү бир катар журналисттерди куугунтуктоо токтотулушу керек, анткени алар дүйнөдөгү эң жабык өлкөлөрдүн бириндеги окуяларды чагылдыруу менен маанилүү ишти аткарып жатышат», — деп билдирди комитеттин Европа жана Борбор Азия өлкөлөрүндөгү байкоочусу Гулноза Саид.

Ачилова редакциясы Венада жайгашкан көз каранды эмес «Түркмөнстан хроникасы» басылмасынын Ашхабаддагы кабарчысы болуп иштейт.

11-мартта ал эл аралык семинарга катышуу үчүн Грузияга учаар маалда Ашхабад аэропортунда токтотулган. Өлкөнүн Иммиграциялык кызматынын өкүлү Ачилова өлкөдөн чыга албай турганын айтып, бул тыюунун себептерин түшүндүргөн эмес.

Былтыр Ачилова укук коргоо органдары тарабынан бир нече жолу кармалып, полиция кызматкерлери менен белгисиз адамдардын зомбулугуна кабылган.