Стамбулдагы Ататүрк аэропортундагы кол салууда курман болгондордун саны 42 кишиге жетти. Шаршембиде жарадар болгондордун бирөө көз жумду. Шейит кеткендердин ичинен 13ү чет өлкөлүк жарандар экени аныкталды. Жарадарлардын саны – 239, алардын арасынан 40 адам жандандыруу бөлүмүндө жатат.

Туркия президенти Режеп Эрдоган 29-июнду - улуттук аза күтүү күнү деп жарыялаган.

Премьер-министр Бинали Йылдырым кабарлагандай, 28-июнь күнү кечинде үч жоочу Ататүрк аэропортунун көзөмөл бекетинин жанында ок чыгарган. Бул учурда эки жанкечти имараттын ичине кирип, жардыруу уюштурушкан. Дагы бирин полиция жаракат кылган учурда ал өзүн өзү көчөдө жардырып жиберген.

Азырынча теракт үчүн жоопкерчиликти эч ким моюнуна ала элек. Бирок түрк бийлиги кандуу окуянын артында “Ислам мамлекети” экстремисттик тобу турат деп эсептейт.

Соңку жарым жыл ичинде Түркияда бир нече ири теракттар уюштурулду. Бул акыркы алты айда Түркияда болгон ири сегизинчи жардыруу болду.