Нооруз майрамын утурлай 20-март күнү Жалал-Абад шаарында сүмөлөк фестивалы өткөрүлөт. Анда Курманбек фольклордук талаада 40 казан асылып, сүмөлөк кайнатылат.

Жергиликтүү бийлик тарабынан демилгеленген бул саамалык бир катар оюн-зооктор менен коштолот жана жеңүүчүлөргө байгелүү орундар менен катар номинациялар ыйгарылат

Шаардык маданият бөлүмүнүн башчысы Салтанат Асилбекованын айтымында, азыркы учурда  иш-чаранын  сценарийи иштелип чыгып, уюштуруу тобу  тарабынан талкууланууда. Эң негизгиси шаар тургундарына майрамдык маанай тартуулоо менен бирге улуттук баалуулуктарыбызды даңазалоо.

- Сынакка катышкан ар бир мекеме-ишкананын жамааттары анда өндүрүлгөн буудайын тартуудан баштап бышырууга   чейинки эрежелер эске алынып, калыстар тобу тарабынан жеңүүчүлөр аныкталат. Ал эми кайнатылган сүмөлөк 21-март күнү борбордук аянттагы иш чарада жергиликтүү  тургундарга таратылат  дейт, -С. Асилбекова.

Аталган иш-чаранын максаты -  быйылкы “Аймактарды өнүктүрүү жана өлкөнү  санариптештирүү  жылында” калаанын туристтик потенциалын жогорулатуу болуп саналат.  Эске сала кетсек, жергиликтүү бюджеттен бул жылы Нооруз майрамын өткөрүүгө 190 миң сом акча каражаты бөлүнгөн.