Орусиянын  Новочеркасск шаарында  тергөөчүлөр "Дон аялдары" уюмунун башчысы Валентина Череватенкого карата кылмыш ишин козгоду. Ал “чет элдик агент” жөнүндөгү мыйзам нормаларын аткаруудан баш тарткан деп айыпталууда. Орусияда мындай берене менен алгач ирет тергөө амалы ачылды.

"Дон аялдары" биримдиги 2014-жылы “чет элдик агенттердин” тизмесине кирген. Череватенко мындан тышкары дал ушундай аталыштагы коомдук фондду дагы жетектейт. Кылмыш ишинде “Дон аялдары” уюму саясий ишмердүүлүк менен алектенген жана чет жактан каржыланып келсе да уюмдун жетекчилиги аны чет элдик агенттердин тизмесине киргизүүдөн качып жүргөнү айтылат.

Эгер ал күнөөлүү деп табылса, эки жылга чейин эркинен ажыратылышы ыктымал.

Череватенко "Ведомости" гезитине берген маегинде тагылган айыптарды четке кагып, муну саясий куугунтуктоо катары баалаган. Анын айтымында, “Жарандык Минск” долбоору башталгандан бери “Дон аялдары” уюмуна басып көрсөтүлүп баштаган. Долбоордун максаты Украинанын чыгышындагы Мниск келишиминин аткарылышын көзөмөлдөө болчу.

Буга чейин Валентина Череватенкону бир нече өлкөнүн укук коргоочулары колдоп чыккан. Алар Тергөө комитетинин бул кадамын жарандык уюмдардын ишине кийлигишүү деп аташып, Орусия муну менен адам укуктары жаатындагы эл аралык милдеттенмелерин бузуп жатканын белгилешкен.