Кечээ, 28-июнь күнү “Этно-Ош” эстрада-фольклордук тобу Казакстанда өтө турган эл аралык этно-джаз жана “Кымызмурундук” фольклордук-этнографиялык фестивалга катышуу үчүн Астана шаарына жөнөп кетти. Бул тууралуу шаардык мэриянын басма сөз кызматы билдирди.

Алынган маалыматка караганда, узатуу салтанатына Ош шаарынын вице-мэри Нурбек Кадыров, Ош шаардык кеңешинин төрагасынын орун басары Шакир Зулимов, маданий жана мекеме-ишканалардын кызматкерлери жана шаар тургундары катышты.

Ош шаарынын мэри Айтмамат Кадырбаевдын атынан вице-мэр Нурбек Кадыров сөз сүйлөп, “Этно-Ош” чыгармачылык тобуна ийгиликтерди каалады.

“ Бул кадам Ош шаары үчүн чоң сыймык. Жаңы гана түзүлгөн чыгармачылык топтун аракети күч. Алардын ар бир аткарган чыгармасы элдердин жүрөгүнөн түнөк тапты. Андыктан “Этно-Ош” эстрада-фольклордук тобу Казакстанга барып маданиятыбызды жар салып, ийгилик менен кайтат деп терең ишенем”,- деди Н.Кадыров.

Айта кетсек, “Этно-Ош” чыгармачылык тобу 1-2-июль күндөрү Астана шаарында өтүүчү эл аралык этно-джаз фестивалында үч чыгарма менен таланттарын тартуулайт. Ал эми 4-5-июль “Кымызмурундук” фестивалына фольклордук жанрдагы чыгармалар менен катышат. Чыгармачылык топтун сапардык чыгымдарын Ош шаардык мэриясы колго алган.  

Белгилей кетсек, «Этно-Ош» фольклордук тобу өткөн жылы Ош шаардык маданият башкармалыгында алдында түзүлгөн. Быйыл 30-апрелде алгачкы концертин тартуулаган.