Жалал-Абад шаарынын Ленин көчөсүнөн сырткары дагы шаардын бир катар жерлеринде оңдоп-түзөө иштери тынымсыз жүрүүдө. Бул тууралуу шаардык коммуналдык чарба жана көрктөндүрүү департаментинин башкы инженери Рашид Назаралиев билдирди.

Анын айтымында, учурда шаардагы  Токтогул эс алуу багына Ленин көчөсү менен кирген жериндеги  жол асфалтталып, жол четиндеги арык цементтелди. Ага бюджеттен 1 миллион 270 миң сом акча каралган. Иш башталганына бир ай болуп калды. Азыр иш толугу менен аяктады. Андан сырткары, автобекеттин жанындагы айлампаны реконструкциялоо иштери жүрүүдө. Ага 683 миң 638 сом бөлүнгөн. Ал каражатка айлампа толугу менен сырдалып, анын айланасына 12 даана фонтан орнотулат.

“Ошондой эле, Бекмамат Осмонов көчөсүндөгү жол четине латок коюлууда. Буга 862 миң сом каралган. Азыр жумуштар аяктайын деп калды. Жыл аягына чейин оңдоп-түзөө  иштери шаардын  көчөлөрүндө кезек-кезеги менен жүргүзүлө бермекчи”, -дейт ал.