Жалал-Абад шаарында үч эм балдары бар батирге муктаж болгон үй-бүлөгө жергиликтүү бийликтер үч бөлмөлүү батир сатып беришти. Бул тууралуу шаардык муниципалдык мүлктү башкаруу комитетинин жетекчиси Болот Джусупбеков билдирди.

Анын айтымында, үч эм бала төрөгөн шаар тургуну Гүлбарчын Мамазаирова шаардагы үй-бүлөлүк жатаканада 2 кыз жана 2 уулу, күйөсү менен жашап келишкенин, үч эм төрөгөн соң жашоо шарты кыйындап кеткенин айтып, жергиликтүү бийликтерге жардам сурап кайрылган. Депутаттардын шаардык кеңешинин депутаттары бул маселени сессияда карап, жергиликтүү бюджеттен 1 миллион 200 миң сом каражат бөлүп, арыз ээсине 3 бөлмөлүү батир сатып берүүнү шаар мэриясына тапшырышкан.

- Биз шарты жакшы 3 бөлмөлүү батирди сатып берип, Г. Мамазаированын үй-бүлөсүн жаңы конушка киргиздик. Эми бул үй-бүлө турак-жай кыйынчылыгынан кутулду, - дейт Б. Джусупбеков.