Жалал-Абад шаардык кеңешинин кезектеги сессиясында Жалал-Абад шаарынын 2019-жылга бюджети жана 2020-2023-жылдарга божомолу жөнүндөгү маселе талкууланып, сессияга катышкан депутаттар бир топ кызуу талаш-тартыштардан кийин алымча-кошумчалары менен аны бир добуштан колдоп беришти. Бул тууралуу шаардык мэриядан билдиришти.

Алынган маалыматка караганда, шаардын быйылкы жылдагы бюджети 474 миллион 675,6 миң сом кирешелери, анын ичинде 79 миллион 67,2 миң сом атайын төлөмдөрдөн түшүүчү кирешелери менен, 474 миллион 675,6 миң сом чыгашалары, анын ичинен 79 миллион 67,2 миң сом атайын төлөм боюнча чыгашалары менен бекитип беришти.

Андан тышкары, 3 миллион сом өлчөмүндө жергиликтүү бюджеттин резервдик фонду түзүлүп, республикалык бюджеттен бөлүнүүчү түрткү берүүчү гранттарды алуу үчүн 12 долбоорго 9 миллион 300 миң сом берилмей болду. Анын баары негизинен билим берүү тармагына жумшалмакчы. Ошондой эле ар бир мекеме-ишкананын жылдык чыгымдары боюнча бюджеттик каражаттар толугу менен бекитилип берилди.

Депутаттар 1-9- класстардын окуучуларын шаардык муниципалдык автобазанын автобустары акысыз ташуусу тууралуу сунуш киргизишип, ал толук колдоо тапты. Ошондой эле балдар бакчаларына, мектептерге балдарды кабыл алууну электрондук тартипте жүргүзүү шаардык билим берүү бөлүмүнө милдеттендирилди.

Депутаттар аткаруу бийлигинен бюджеттик каражаттарды үнөмдүү жана сарамжал пайдаланууну талап кылышты. Мисалы катары, Ленин көчөсүнө коюлган гүл клумбалары айтылды, анткени ага бюджеттик каражаттар корогон, бирок ылайыксыз делинип, кийин алып салынган.

Жергиликтүү бюджеттин резервдик фонду түзүлүп, республикалык бюджеттен бөлүнүүчү түрткү берүүчү гранттарды алуу үчүн 12 долбоорго 9 миллион 300 миң сом берилмей болду. Анын баары негизинен билим берүү тармагына жумшалмакчы. Ошондой эле ар бир мекеме-ишкананын жылдык чыгымдары боюнча бюджеттик каражаттар толугу менен бекитилип берилди.

Депутаттар жер асты өтмөгүн куруудан келип чыккан айрым кемчиликтерге токтолушуп, кыйла талаш-тартыштар жүз берди. Ошондой эле быйылкы пландалып жаткан иштерди толугу менен ишке ашыруу талабы айтылды. Анткени өткөн жылдагы пландалган иштердин 67 миллион сомдук көлөмү бүтпөй быйылкы жылга өткөнүн бетке кармашты.

Кандай болгондо да, шаар бюджети быйыл шаардык кеңештин депутаттарынын аракети менен эрте кабыл алынып, жаз алды менен жалпы иштерди да эрте баштоого жол ачылды.