Саламаттыкты сактоо министрлиги Жалал-Абад облустук үй-бүлөлүк медицина борборунун жасаган эмгектерин жогору баалап, “Энеге жана балага мээримдүү мамиле жасаган үй-бүлөлүк медицина борбору” деген наам менен алтын сертификат берүү чечимин чыгарып, медицина кызматкерлеринин кесиптик майрамына белек катары тартуулаганы жатышат. Бул тууралуу маалыматты Жалал-Абад аталган борбордун директорунун дарылоо иштери боюнча орун басары Хадича Пратова билдирди.

Анын айтымында, Жалал-Абад облустук үй-бүлөлүк медицина кызматкерлери баланы көкүрөк сүтү менен эмизүүнү жайылтуу жана колдоо боюнча кош бойлуу аялдарды, ымыркайлары бар энелерди окутуп, үйрөтүп шаардын калкынын арасынан тайпаларды түзүп, үзүрлүү эмгектенип жатышат.

“Жогоруда жасаган эмгектерибизди КР Саламаттыкты сактоо министрлиги жогору баалап, “Энеге жана балага мээримдүү мамиле жасаган үй-бүлөлүк медицина борбору” деген наам менен алтын сертификат берүү чечимин чыгарып, медицина кызматкерлеринин кесиптик марамына белек катары тартуулаганы жатат. Бул биздин жасаган эмгегибиздин арты менен жетишкен ийгилигибиз болуп саналат. Анан бул жетишкендик бизде акыркысы болбойт деген ишенимдемин”, -дейт ал.