Жалал-Абад шаарынын Тайгараев аймактык башкармалыгында облустук клиникалык ооруканасынын тери, жыныстык оорулар бөлүмү 1990-жылдан бери иштеп келе жатат. Мурда 200 койкалуу диспансер болгон болсо, азыркы учурда 25 койкалуу оорукана элге медициналык кызмат көрсөтүп келүүдө. Бул тууралуу маалыматты аталган бөлүмдүн башчысы   Жоомарт Закиров   билдирди.                

Анын айтымында, мурда бул бөлүм чоң оорукана болгон болсо, КР Саламаттыкты сактоо министрлиги реформлоо менен кыскартып олтуруп, азыркыдай 25 орундуу бөлүм болуп калды. Бул жерде жалпы 28 кызматкер эмгектенет. Анын ичинен бешөө дарыгер, төртөө жогорку даражадагы медайым, он бири кенже кызматкерлер, төртөө кароол кызматында иштешет.

- Бизге көбүнчө жаш балдар келип жатышат. Алар чакалай, кычыткы оорулары менен көп кайрылышат. Өспүрүмдөр жазда жана күздө бизге көп келишет. Анткени,  алар чалдыккан оорулар мал жандыктарынан жугат. Күздө малдар жайлоодон келишет, малга жакын балдарга оору жугуп калышы толук мүмкүн.  Ал эми улуу муундагылар болсо псариаз, экзема, буттун грибок оорулары менен келип жатышат. Мурда чакалай  оорусуна чалдыккандар 45 күн дарыланган болсо, азыр алар 15 күндө эле толук айыгып чыга алышат. Ал эми кычыткы, псариаз жана башка оору менен жаткандар бир жуманын ичинде дарыланып чыгышат,- деди Ж.Закиров.