Кытайдын Шинжаң аймагынан келген бир нече миң казак кайрылмандары ар кыл себептерден улам жарандык ала албай келишет. Бул тууралуу “Ел-аманат” коомдук бирикмесинин жетекчиси Рысбек Токтасын билдирди.

Бирикме “кайрылман күбөлүгүнүн” мөөнөтү өтүп кеткендигине байланыштуу жарандык ала албай жүргөн 3200 кишинин тизмесин түзгөн.

“Убагында кайрылмандардан Кытайда соттолбогондугу тууралуу маалымкат талап кылышкан. Мындай маалымкатты алуу кыйын. Паспортунун мөөнөтү өтүп кеткен кайрылмандар Кытайга кирип чыгуу учурунда кармалып калуу коркунучуна кептелген учурлар катталган. Көптөгөн кишилер бул өлкө бийлигинин чакыруусу менен Кытайга кетүүгө аргасыз болгон. Ал жакта алардын “кайрылман күбөлүгүнүн” мөөнөтү өтүп кеткен”, – деди Рысбек Токтасын.

Кытайдан келген кайрылмандар казак жарандыгын берүү жоболорун жеңилдетүүнү сурашууда. Казакстандын Эмгек, социалдык коргоо жана миграция комитетинде “кайрылман күбөлүгүнүн” мөөнөтү өтүп кеткен канча этникалык казак бар экени тууралуу маалымат жок.

Казакстанда кайрылман макамы жана күбөлүгү бир жылдык мөөнөт менен берилет. Былтыр бул мөөнөттү дагы үч айга узартуу чечими кабыл алынган.

Бул арада Кытайда жарандыктан жана өлкөдөн чыгуу эрежелерин бузган казактарды кармоо жараяны токтой элек.