Алматыда көркөм муз тебүү чебери Денис Тендин апасы анын өлүмүнө байланыштуу козголгон кылмыш ишин кайрадан тергөөнү талап кылууда.

Жабырлануучу тарап Денис Тен буюртма менен өлтүргөн деп эсептейт. 16-январда Алматы район аралык сотунда жарыш сөз башталган. Прокурор бул иш боюнча айыпталган үч кишини түрмөгө кесүүнү сураган.

Маркумдун апасы Оксана Тендин айтымында, видео көзөмөл камераларындагы жазууларга жана соттолуучулардын көрсөтмөсүнө ылайык, шектүүлөр автоунаанын ээси ким экенин алдын ала билишкен:

Мен Алматы шаарынын прокуроруна карата жеке токтом чыгаруу керек деп эсептейм. Жогорудагы фактылар боюнча кайрадан сотко чейинки иликтөө жүргүзүп, күнөөлүүлөрдү “Жалданма киши өлтүрүү” беренеси менен соттоо керек деп эсептейм.

Прокуратура өкүлү жабырлануучунун өтүнүчүн колдогон жок.

2014-жылы Сочиде өткөн кышкы Олимп оюндарынын коло медалынын ээси Денис Тенди 19-июлда түштө Алматынын борбордук бөлүгүндө кылмышкерлер бычактап кетишкен. Полициянын маалыматына караганда, ага автоунаа уурулары кол салган. Тен алган жараатынан ооруканада каза тапкан.