Түркмөнстандын президенти Гурбангулы Бердымухамедов

Түркмөнстанда бир катар район жетекчилери алмашты. Тиешелүү жарлыкка өлкө президенти Гурбангулы Бердымухамедов кол койгонун мамлекеттик маалымат каражаттары жазышты.

Маалыматка караганда, Ахал облусунун Бахерден районунун былтыр Айыл жана суу чарба министри болуп дайындалган башчысы Аннагелди Язмырадовдун ордуна Аннаев Гурбанмухаммет дайындалды.

Мындан тышкары Дашөгүз облусунун Губадаг районунун акими кызматына Нуржанов Халжан, Лебап облусундагы Довлети районунун башчылыгына Гылыджов Батыр, Койтендаг районунун акими кызматына Аллакулыев Сохбет, Мары облусунун Мургаб районунун башчылыгына Агамырадов Агамырат дайындалды. Жарлыкта аталган райондордун мурдагы башчылары «ишиндеги кемчиликтери үчүн» кызматтан алынганы жазылган.

Түркмөнстан президенти министрлерди, облус жана район жетекчилерин, жогорку кызматтагы башка аткаминерлерди жана расмий маалымат каражаттардын башчыларын тез-тез алмаштырып турат. Анда көбүнчө алардын иштен алынышынын себеби катары «ишиндеги кемчиликтер» көрсөтүлүп келет.