Самарканд облусунда 35 жаштагы аялдын катуу сабалганы тууралуу макала жарыялангандан кийин Өзбекстандын Башкы прокуратурасы бул ишти өз көзөмөлүнө алганын маалымдады.

Самарканд облусунун 35 жаштагы тургуну Феруза Убайдуллаева өзү иштеген фермада эки киши тарабынан сабалганын билдирген. Жабырлануучунун айтымында, ал 2018-жылдын октябрь айында кордук көргөн. Ага кол көтөргөн жергиликтүү фермердин инилери бардык процессти видеого тартып, Интернетке жүктөшкөн. Тасмадан эки эркек киши аялдын колун кайрып, жерге жыгып, кордогонун көрүүгө болот.

Бул арада Феруза Убайдуллаева эки эркек киши аны чечиндирип, зордуктоого аракет жасаганын айткан. Бирок бул учур видеодон табылган эмес.

Самарканддык аялдын катуу сабалганы тууралуу макала жарыялангандан кийин Өзбекстандын Башкы прокуратурасы бул ишти өз көзөмөлүнө алды. “Кыйноо” беренеси боюнча кылмыш иши козголду.

Өзбекстандын Аялдар комитети Самарканд облустук сотунда Феруза Убайдуллаевага коомдук коргоочу катары көмөк көрсөтөрүн билдирди.