АКШнын президенти Дональд Трамп Ооганстанда «Ислам мамлекети» тобуна каршы күрөшүү тууралуу айтып жатып, анда башка өлкөлөрдүн аскерлери согушса жөндүү болорун билдирди.

«Эмнеге ал жакта Орусия жок? Эмнеге Пакистан жок? Эмнеге Индия жок?», — деди Трамп.

Ошол эле учурда ал 1980-жылдардагы Ооганстандагы согуш Советтер Союзун банкротко кептеп, аны Орусияга айлантканын белгиледи.

«Орусия мурда СССР болгон. Ооганстан аны Орусия кылды, анткени алар Ооганстанда согушуп жатып банкротко кептелишти. [...] Орусия террорчулар анын аймагын көздөй жылып бараткандыктан Ооганстанга барган. Алардын [орусиялыктарды] ал жакта болууга укугу бар болчу. Анда күрөш оор болгондуктан, алар банкрот болушкан. Ошондуктан Советтер Союзу эмес, Орусия болуп калышты. Силер Орусияныкы деп эсептеп келген жерлер, Ооганстандан улам азыр Орусиянын бөлүгү болбой калган», — деди Трамп.

Советтер Союзу Ооганстанга 1979-жылы кирип барган. Советтик армия анда Кабулду көзөмөдөө үчүн күрөш жүргүзүп келген түрдүү моджахеддер тобуна каршы согушкан. Советтер Союзу көп жылдык жоготуулардан кийин аскерлерин 1988-1989-жылдары чыгарып кеткен. СССР расмий 1991-жылы 26-декабрда кулаган.

Трамп америкалык аскерлерди Ооганстандан чыгарып кетүү тууралуу эч кандай расмий билдирүү жасаган жок. Учурда анда 14 миңге жакын АКШ аскери бар.