Бүгүн, 24-июнь күнү Жалал-Абад шаардык мэриясынын кеңешме залында 6-июнь - Бүткүл Дүйнөлүк баңги затына каршы күрөшүү күнүнө карата облустук үй-бүлөлүк дарыгерлер борборунун демилгеси менен тегерек стол болуп, ага шаардагы бир катар орто кесиптик билим берүү мекемелеринин, коомдук уюмдардын, укук короо органдары жана  облустук казыяттын өкүлдөрү катышты. Бул тууралуу шаардык мэриянын басма сөз кызматы билдирди.

Алынган маалыматка караганда, анда негизинен учурда коомчулукта айрыкча жаштар арасында баңгизаттын ден-соолукка тийгизген терс таасири, аны алдын алуу боюнча бир катар маселелер талкууланды. Үй-бүлөлүк дарыгерлер борборунун ден-соолукту чындоо бөлүмүнүн адиси Шайлоокан Төрөбекованын айтымында, негизги максат - коомчулукка баңгизатынын тийгизген терс таасири тууралуу, дегеле келечек муундун ден-соолугуна болгон эл арасында кенен жеткирүү. Бул ишке баары чогуу катышуусу абзел.

Андан тышкары, тегерек столдо сөз сүйлөгөн Жалал-Абад областтык психикалык саламаттык борборунун наркология бөлүмүнүн жетекчиси Махпурат Умарованын айтуусу боюнча, бүгүнкү күндө област боюнча алты айдын эсебинен 476 адам баңгизатына көз каранды катары каттоодо турат. Алардын арасынан 147 адам баңгизатын ийне аркылуу кабыл алышат. Ал эми  шаар боюнча бул илдетке кабылган 80 адам каттоодо турат. Ал эми район-шаарлардын ичинен Сузак районунда 160 адам көзөмөлдө турат.

Тегерек столдогу талкуунун аягында баңгизатка каршы күрөштү коомчулуктун жардамы менен  күчөтүү боюнча резолюция кабыл алынды