АКШ Мамлекеттик департаменти Түркияга үч жарым миллиард долларга бааланган "Патриот" зениттик-ракеталык комплекстерин сатууга макулдук берди. Бул тууралуу АКШнын коргоо министрлиги билдирди.

Анкара жалпысынан төрт комплекс сураган. 2017-жылы Түркия С-400 зениттик-ракеталык комплекстерин сатып алуу боюнча Орусия менен келишим түзгөн. Анкарага алардын алгачкы партиясы 2019-жылы келмек.

АКШ жана НАТОнун өкүлдөрү орусиялык ракеталык системалар НАТОнун ракетага каршы коргонуу системалары менен интеграция боло албасын эскертишкен. Вашингтон эгер Анкара Орусиядан курал сатып алса, санкцияга кабыларын айтып, америкалык “Патриот” системасына артыкчылык берүүнү сунуштаган. Бирок түрк бийлиги америкалык зениттик-ракеталык комплекстер орусиялык С-400гө альтернатива боло албасын билдирген.

Ноябрдын аягында Түркиянын тышкы иштер министри Мевлүт Чавушоглу Орусиядан С-400 комплекстерин сатып алуу келишими жокко чыгарылбай турганын маалымдаган. Ошол эле маалда ал өзү НАТО боюнча союздаштарынан курал сатып алууга артыкчылык берерин билдирген.