Сирия жаңжалын жөнгө салуу боюнча Орусиянын, Түркиянын жана Ирандын Астанадагы сүйлөшүүсүнөн эч кандай майнап чыккан жок. Бул тууралуу бейшембиде БУУнун Сирия боюнча атайын чабарманы Стаффан де Мистура билдиргенин Reuters агенттиги жазды.

Маалыматка караганда, ал сүйлөшүүлөрдүн жүрүшүндө тараптар Сирияда Конституциялык комитет түзүү боюнча бир келишимге келе албаганына өкүнгөнүн билдирди.

Бул комитет Мистура менен бирге Сириянын жаңы Конституциясынын долбоорун түзмөк. Сирия өкмөтү менен оппозициясынын 150дөй өкүлүнөн турган комитет түзүлгөндөн кийин БУУнун демилгеси менен уюштурулган Женева сүйлөшүүлөрү кайра жанданмак.

Жакында эле де Мистура жыл аягына чейин комитет түзүлбөсө, мындан ары ага аракет кылбай турганын билдирген.

Астана сүйлөшүүлөрү былтыр жыл башында Орусиянын демилгеси менен башталган. АКШ бул "майнапсыз сүйлөшүүлөр" үчүн Москва менен Дамаскты сындап келген. Орусия, Иран, Түркия демөөрчү болгон Астана сүйлөшүүлөрү 2017-жылдан бери бир нече айлампа менен өттү.