Казакстанда каттоодон өтпөгөн  “Алга” партиясынын мурдагы лидери, оппозициячыл саясатчы Владимир Козлов мөөнөтүнөн мурда абактан бошотууну суранууда. Ал 2012-жылы жети жарым жылга кесилген болчу.

"Азаттыктын" казак кызматына анын жактоочусу Айман Умарова кабарлагандай, 16-июнда берилген арыз качан каралары белгисиз.

- Арызды Капшагай шаардык соту карашы керек. Мөөнөтүнөн мурда бошотуу үчүн абактагы адамдын жүрүм-турумуна көңүл бурулат. Козлов буга чейинки тартип бузууларды жойгон, - дейт ал.

Владимир Козлов мындай арыз менен экинчи ирет кайрылууда. Анын биринчи арызы абакта тартип бузгандыгы үчүн четке кагылган.

Владимир Козлов 2012-жылы Жаңы Өзөндөгү окуялар учурунда эл арасында ажырым пайда кылган чакырыктарды жасаган деп айыпталган. Ал жети жарым жылга кесилген болчу. Саясатчы бул айыпты саясий куугунтук катары баалайт.