Тажикстан интернет ылдамдыгы боюнча 124 өлкөнүн ичинен эң начар деп табылды. Speedtest Global Index рейтингинде Тажикстан эң акыркы орунда жайгашкан.

2018-жылдын октябрь айында жаңыланган рейтингде Тажикстан Ооганстан, Ирак, Алжир жана Венесуэла менен бир катарда турат. Борбор Азияда мобилдик интернеттин ылдамдыгы боюнча Казакстан – 74, Кыргызстан – 94, Өзбекстан 110-орунда.

Мындан тышкары зымдуу интернет ылдамдык боюнча да маалыматтар бар. Бирок Тажикстан бул рейтингде көрсөтүлгөн эмес. Казакстан зымдуу интернет боюнча 58 орунда жайгашкан. Кыргызстан – 79, Өзбекстан 112-позицияны ээлеген.

Тажикстанда колдонуучулар интернет ылдамдыгынын начар экенине даттанып келишет. Жыл башынан бери интернет Бирдиктүү коммуникациялык борбор аркылуу бериле баштагандан бери ого бетер жай иштеп калган.

Бул арада тажик бийлиги эки жума мурун Фейсбук, Одноклассник социалдык түйүндөрүн жана Youtube порталын да жаап койгон. Viber, What's App жана Telegram мессенжерлерине да чектөө киргизилген.

Тажикстанда быйыл “Терроризм менен күрөшүү жөнүндө” мыйзамга өзгөртүүлөр киргизилген. Ага ылайык, укук коргоо органдары телефондук байланыш жана интернетке чектөө киргизүүгө укук алышкан.