Новосибирскте Өзбекстанды туристтик өлкө катары таанытуу иш-чарасы өтүп, ал жакка орусиялык туристтердин аз барышынын себептери аныкталды.

Өзбекстандын Орусиядагы элчиси Батиржон Асадов 2018-жылдын январь айынан тарта сентябрга чейин орусиялык туристтердин саны 30% өскөнүн, жалпысынан 350 миң киши барганын маалымдады.

Бирок Орусия туроператорлор ассоциациясы ФСБнын чек ара кызматынын маалыматына таянуу менен Өзбекстанга болгону 128 808 киши барганын, анын ичинен 27 158и туристтик максатты көздөгөнүн билдирди. Бул 2017-жылдагы көрсөткүчкө салыштырмалуу 25.9% пайызга көп.

Өзбекстанга орусиялык туристтердин аз барышына – авиакаттамдын кымбаттыгы, поезд жолунун алыстыгы жана Өзбекстанды туристтик багыт катары көрсөткөн жарнамалардын аздыгы себеп болуп жатканы белгиленди.

Быйыл октябрда Өзбекстандын Туризмди өнүктүрүү боюнча мамлекеттик комитети «Туту.ру» сайтына шилтеме берүү менен орусиялыктар арасында Жаңы жылды тосуу үчүн Өзбекстан эң популярдуу өлкө аталганын маалымдаган. Былтыркы рейтингде республика жетинчи орунда болгон. Экинчи орунда Германия, үчүнчү орунда Чехия жайгашкан.