Эл аралык Олимпиада комитети допингге тиешеси бар орусиялык спортчуларды жана аткаминерлерди Рио-де-Жанейро Олимпиадасынан четтетүү тууралуу Эл аралык жеңил атлетика федерациясынын чечимин колдоду. Бул тууралуу комитет төрагасы Томас Бах билдирди.

Анткен менен кызытмадан кармалбаган орусиялык жеңил атлеттер команда катары эмес, жеке өздөрү 2016-жылкы Олимпиадага катыша алышат.

“2016-жылдагы Олимпиада оюндарынан орусиялык жеңил атлеттер гана четтетилди. Калган 27 улуттук федерация жөнүндө сөз жок” деди Бах.

Дүйнөлүк спорттогу допинг жаңжалы 2014-жылы тутанган. Канынан кызытма табылгандардын көбү орусиялык спортчулар. Алардын арасында Олимпиадада уткандар да бар.