“Жалалабатэлектро” ачык акционердик коому Ноокен районуна караштуу 35 кВ “Избаскент Рахманжан” аба чубалгысынын 8 чакырымын жаңылап жатат.   

Ишкананын басма сөз кызматынын жетекчиси Жыпариза Уметалиеванын берген маалыматына караганда, АС 70 аба чубалгылар АС 95 аба чубалгыларга алмаштырылууда. Аталган электр чубалгылары 1969-жылы курулгандыктан эскилиги жетип, күз-кыш айларында авариялык абал катталып, кыска чыңалууларды  жаратып турган.  Мындан улам,  электр энергиясынын техникалык жоготууларын азайтып, кыш айларындагы авариялык өчүүлөрдү кыскаратуу максатында 14 чакырым аба чубалгынын 8 чакырымы жаңыланууда.

Бүгүнкү күндө Избаскент жана “Жалалабатэлектро” ачык акционердик коомунун жогорку чыңалуудагы жабдууларды тейлөө кызматынын адистеринен турган 2 бригадалык топ иштеп жатышат, кошумча 3 техника тартылган. Учурда жумуштун 80 пайызы бүткөрүлдү.

“Мындан тышкары 35 кВ “Рахманжан” көмөк чордонунун эски өчүргүчтөрү 5 даана жаңы ВАКУУМдук өчүргүчтөргө алмаштырылды”, - дейт Ж.Уметалиева.