Өзбекстандын эл артисти Юлдуз Усманова 23-24 июнь күндөрү Ташкентте өтө турган Шанхай кызматташтык уюмунун (ШКУ) саммитине арнап ыр чыгарды. Сынчылар анын ырын чоң сахнага кайтып келүү аракети катары баалашты.

Анткени 2005-жылдан бери Юлдуз Усманованын чыгармачылыгына тыюу салынган. «Узбекнаво» эстрадалык бирикмесинин лицензиясына ээ экенине карабастан, чоң сахнага чыгууга бөгөт коюлган. Ырлары телекөрсөтүү жана радио аркылуу берилбей калган.

Буга нааразы болгон ырчы Өзбекстандан чыгып кетип, Түркияда иштеп келген. Мекенине 2011-жылы кайткан Усманова бардык күч-аракетин чоң сахнага чыгуу үчүн расмий түрдө уруксат алууга жумшаган. Бирок чектөөлөрдү убагында бийликке таасири күчтүү Өзбекстан президентинин кызы Гүлнара Каримова дагы алып сала алган эмес.

Өткөн жылдын соңунда Усманова президент Ислам Каримовдун жеке өзүнө да арнап ыр чыгарган. Ырчы мамлекет башчысын өзбек «падышасы» деп атаган. Бирок президентке жолдонгон ыр дагы анын чоң сахнага кайтып келишине жардам бере алган жок.