Душанбе шаарынын Фирдоуси паркында өткөн палоо фестивалы жаңжал менен коштолду.

10-ноябрда иш-чаранын расмий бөлүгүнөн кийин чогулган эл казанга жулунуп, палоону түз эле колдору менен жеп, талашып-тартышканга чейин барышкан.

Душанбе шаарынын мэриясы калаа тургундарынын адепсиз кылык-жоругуна нааразы болуп, айрым кишилер жазага тартылганын билдирди.

Фестиваль үчүн Душанбедеги белгилүү жети ашпозчу аш баскан. Ал үчүн 250 килограмм күрүч, 200 килограмм эт, 35 килограмм сабиз, 90 литр май, 1 килограмм зире жана 5 килограмм мейиз кеткен. Ашпозчулардын билдиришинче, палоонун жалпы салмагы бир тоннадан ашкан.

Душанбедеги эң ири палоодон тышкары сейил бактын айланасында дагы 400 казанда аш басылган, бирок ал жерде тамак үчүн талаш болгон эмес.

2017-жылы сентябрда Ташкентте салмагы жети жарым тонналык дүйнөдөгү эң ири палоо басылган. Бул Гиннес рекорддор китебине кирген. Аш тууралуу алдын ала маалымат берилгендиктен, Ташкенттин борборуна миңдеген киши келген. Бирок аларды казандын жанына жолотушкан эмес. Иш-чарага аткаминерлер, дипломаттар, ММК өкүлдөрү гана күбө болгон. Калгандар палоонун басылышын видеоэкрандан гана көрүшкөн.