Япониянын Эл аралык кызматташтык агенттиги (JICA)тарабынан жүргүзүлүп келген "Бир айыл – бир өндүрүм!” долбоору эми Жалал-Абад облусунда да ишке ашырылат. Бул тууралуу АгроЛид КБнин облустагы менеджери Айбек Абдырахманов билдирди.

Анын берген маалыматына караганда, Дүйнөлүк тамак-аш боюнча коопсуздук стандартынын (ХАСПП) талаптарына ылайык, Жалал-Абад облусунун бренди болгон өндүрүмдөрдүн алгачкы тандоосу К.Ш. Токтомаматов атындагы Эл аралык университетте (ЭАУ) өткөрүлдү. Алгачкы тандоо иш-чарасына "Бир айыл – бир өндүрүм!” платформасынын төрагасы, Кыргыз Республикасынын Жалал-Абад облусу боюнча ыйгарым укуктуу өкүлүнүн орун басары Ырысбек Ызабеков, аталган платформанын мүчөлөрү, Сузак, Базар-Коргон райондорунан, Жалал-Абад шаарынан айыл-чарба продукциясын өндүрүүчүлөр жана облустун бренди болгон өндүрүмүн илгерилетүүчү чет мамлекеттик шериктештер катышышты.

“Иш-чара убагында бул долбоордун облус аймагында ишке ашырылышынын айрым практикалык маселелери чечилди. Жалал-Абаддын бренди деп эсептелген азыктар эми чет жакка Жалал-Абаддын атайын эн белгиси  аркылуу таркатылып жан сатыкка чыгарылат. Бул иш-чарада Жалал-Абад облусунун бренди эсептелген татыктуу өндүрүмдөрдүн алгачкы партиясын тандоо жүргүзүлүп,  жаңгак жана кургатылган мөмө-жемиштерден жасалган өндүрүм, жаңгак майы, алма, өрүк жана кара өрүктөн жасалган как, кургатылган кара өрүктөн жасалган өндүрүм жана башкалар тандалып алынды”, - дейт өкүлдүн орун басары Ы.Ызабеков.

Бул долбоордун облус аймагында жүргүзүлүшү Жалал-Абад областынын айыл чарба жана кайра иштетүү тармагынын өндүрүмдөрүн ички, тышкы сооданы илгерилетүүдө абдан маанилүү жана келечектүү иш-чаралардан болуп эсептелет.