Түркмөнстандын Балкан облусунда төөлөр жапырт түрдө белгисиз илдетке чалдыгышты. Буга байланыштуу жергиликтүү бийлик төө этин сатууга жана колдонууга тыюу салды.

“Азаттыктын” түркмөн кызматы билдиргендей, мал ылаңы алгач Иран менен чектеш айылдарда башталган. Түркмөн ветеринарлары төөлөр чечек оорусуна чалдыккан деп эсептешүүдө, бирок илдетке каршы эмдөө жүргүзүшө элек.

Этрек жана Эсенгулий райондорунда чечекке чалдыкты делген 200дөй төө атайын кашааларда кармалууда. Мындан тышкары кишилер үчүн да карантин киргизилди.

Жергиликтүү тургундар эмдөө чаралары көрүлбөй, ылаң тез тарап жатканына кабатыр болушууда.