Тажикстанда Чек ара аскер башкармалыгы тажик-ооган чек арасындагы кол салуу фактысы боюнча кызматтык иликтөөсүн аягына чыгарды.

26-августта Тажикстандын Ооганстан менен чектеш Фархор аймагынын үч тургуну "Нива" автоунаасы менен баратканда ок атууга дуушар болгон. Кылмышкерлер аларды миномет жана Калашников пулемету менен аткылашканы кабарланган. Экөө мерт болуп, бирөө жаракат алган.

Кызматтык териштирүүнүн жыйынтыктарына караганда, кол салуу “Талибан” кыймылынын жоочулары эмес, маңзат аткезчилеринин белгисиз тобу тарабынан жасалган. Бирок тажик-ооган чек арачылары алардын өздүгүн азырынча тактай элек.

Кол салуудан аман калган токойчу Сафархон Рахимов кылмышкерлерди көрбөгөнүн, бирок алар тажик тараптан ок чыгарышканын билдирген.

“Азаттыктын” тажик кызматынын өз булактары билдиргендей, иликтөөлөрдүн жыйынтыгы менен Фархор районунун чек ара бөлүгүнүн командири ээлеген кызматынан бошотулду. Маңзат аткезчилери Тажикстан аймагына кирип эле келбей, кол салууга барышканы үчүн кезметтеги офицерлер шалаакылыкка айыпталып, дисциплинардык жаза алышты.