Казакстандык монополисттер тарифтерди жогорулатуунун эсебинен миллиардаган киреше таап келишкен. Бул тууралуу өлкөнүн башкы прокурору Кайрат Кожамжаров билдирди.

«Монополисттер тарабынан көптөгөн каржылык мыйзам бузуулар, анын ичинде өз чыгашаларын атайылап көбөйтүү фактылары аныкталды. Алар 29 миллиард теңгеге (80 млн доллардан ашык) күмөндүү келишимдерди түзүшкөн», — деди Кожамжаров

Башкы прокуратуранын версиясы боюнча, чыгымдарды көбөйтүү максатында жогорулатылган баада жабдууларды оңдоо жана сатып алуу боюнча атайын тейлөө ишканалары түзүлгөн. Мындай мыйзамсыз жол менен табылган киреше белгилүү бир компаниялар аркылуу сыртка чыгарылып келген.

Кожамжаров кошумчалагандай, бул жасалма чыгымдардын орду калктын эсебинен толтурулган. Мындан тышкары алардын «тарифтерине негизсиз түрдө жумушчуларга төлөнчү сыйакылар менен бонустар дагы кошулуп эсептелип турган».