Жалал-Абад шаарынын мэри Мураталы Тагаевдин буйругу менен  шаар аймагында “Эне тил жана Ч. Айтматов” аттуу үч айлык жарыяланды. Ал 17-сентябрдан 20-декабрда чейин улантылат. 

Анын негизги максаты - залкар жазуучу Чыңгыз Айтматовдун 90 жылдык мааракесинин алкагында кыргыздын улуттук тилин, баалуулуктарын жайылтуу, даңазалоо, улуттар аралык ынтымакташтыкты бекемдөө болуп саналат.

Бул үч айлык негизинен шаарда жайгашкан жогорку жана орто окуу жайларында, шаар билим берүү тармагында жүрүп, жаштарды тарбиялоого багытталган.

Үч айлыктын алкагында окуу жайларында ар кандай программадагы иш-чаралар өткөрүлүп, тематикалык дубал гезиттер чыгарылат. Конференцияларды, спорттук таймаштарды жана тематикалык дебаттарды, викториналарды уюштуруу каралды. Эң башкысы, мамлекеттик тил кабинеттерин уюштуруп, анда Ч. Айтматовдун чыгармаларынан көркөм окууларды өткөрүү жана тил байлыгын өстүрүү чаралары жүрмөкчү.

Шаар мэринин буйругу аркылуу үч айлыкты өткөрүү боюнча шаардык уюштуруу комитети түзүлүп, ага шаардын вице-мэри баш болгон шаардык ишканалардын 9 жетекчиси кирди. Ошондой эле үч айлыкты уюштуруп-өткөрүүнүн иш-чаралары бекитилди