Дарыкана, Ашхабад

Ашхабадда жыл башынан бери дары-дармектин баасы кеминде эки эсеге кымбаттады. Бул тууралуу «Азаттык» радиосунун түркмөн кызматы кабарлады.

«Январдан октябрга чейин Ашхабаддагы мамлекеттик дарыканаларда дары-дармектин баалары кыйла жогорулаган. Алсак, "Кавинтон" 65 манаттан (18 долларга жакын) 113 манатка чейин кымбаттаган. "Нистатин" дарысынын баасы 6 манаттан 12 манатка "Пирацетамдыкы" 3 манаттан 12 манатка көтөрүлгөн", - деп жазды басылма.

Маалыматка караганда, дарылардын айрым түрлөрү үч-төрт эсеге кымбаттап кеткен. Ошол эле маалда буга чейин эле берекесиз болгон мамлекеттик дарыканалардын текчелери дагы кыйла бошоп калган.

Буга байланыштуу өлкөдө дары-дармек саткандардын көмүскө базары пайда болгон. Айрым учурларда анда мөөнөтү өтүп кеткен дарыларды кезиктирүүгө болот.

Жеке дарыканаларда дарынын түрү көп болгону менен баалар кыйла кымбат.