Эки күндөн бери Түркмөнстандын Дашөгүз облусундагы мамлекеттик дүкөндөргө ун түшө элек. Бул тууралуу 16-октябрда «Азаттык» радиосунун түркмөн кызматынын аймактагы өз булактары кабарлашты.

«Дашөгүздөгү мамлекеттик дүкөндөрдө сатыкта ун жок. Адамдар облустагы ун заводдун алдына чогулуп жатышат. Ун сатылбай жаткандыктан, жеке дүкөндөр менен базарларда нан жок. Эки күндөн бери ушундай болууда», — деп билдирди булак.

Басылманын башка аймактардагы кабарчыларынын айтымдарында, мындай көрүнүш өлкөнүн башка облустарында дагы байкалууда.

Лебаптагы кабарчынын маалыматына караганда, аймактагы мамлекеттик дүкөндөрдө дээрлик ун табууга мүмкүн эмес.

Ашхабад шаары жана Балкан облусундагы мамлекеттик дүкөндөрдө жергиликтүү өндүрүштөгү ун жок болуп жатканын түркмөн байкоочусу Аманмурат Бугаев билдирди. Анын айтымында, ундан тышкары ал дүкөндөрдө өсүмдүк майын сатууда дагы чектөөлөр болууда.