Иллюстрациялык сүрөт

15-октябрда Анжиян облусунун Боз районундагы пахта талаасында 56 жаштагы тургун Орифжон Солиев каза болду. Бул тууралуу күбөлөр кабарлашты.

«Биз коңшу талаада пахта терип жатканбыз. Болжол менен эртең мененки саат ондордо Орифтин каза болгондугу тууралуу кабар уктук. Ал коңшу райондогу каржы бөлүмүндө кароолчу болуп иштечү. Пахта талаасына ал 14-октябрда барып, жумушка эртеси чыккан. Бир аздан кийин анын жүрөгү кармап, дароо тез жардам кызматы чакырылган. Бирок келген дарыгерлер ал инфарктан каза болуп калганын айтышты», – деп билдирди күбөлөрдүн бири.

Жергиликтүү медицина бөлүмүнөн Орифжон Солиевдин сөөгү Анжиян облустук соттук-медициналык экспертиза бөлүмүнө жөнөтүлгөнүн кабарлашты.

Пахта талаасында иштеп жүргөн жарандардын биринин айтымында, Солиевдин өлүмүнөн кийин жергиликтүү бийлик пахта теримге чыккан бардык адамдарды медициналык текшерүүдөн өткөрө баштады.

Орифжон Солиев быйыл пахта талаасында жүрөгү кармап каза болгон алгачкы өзбекстандык эмес. 10-октябрда Ташкенттин Кибрай районунун 61 жаштагы тургуну Юлдаш Ашуров пахта тере баштаганда жүрөгү кармап каза болгон. Ал жергиликтүү бийлик тарабынан коңшу райондогу пахта талаасына мажбурлап жөнөтүлгөн.