Азык-түлүк дүкөнүнүн алдында нанга кезек күткөндөр. Ашхабад, 16-октябрь 2018-жыл

Калкты ун жана нан менен камсыз кылуудагы көйгөйлөрдүн көбөйүп жаткандыгына байланыштуу Түркмөнстандын аймактарында жашаган тургундар өлкөдөн чыгып кете башташты. Бул тууралуу «Түркмөнстан хроникасы» басылмасы кабарлады.

Маалыматка караганда, акыркы кездери Мары облусундагы райондордо бош калган үйлөр көбүрөөк кездеше баштады. Алардын ээлеринин айрымдары биротоло кетип жатышса, каатчылык шартында мүлктөрүн сатып, акчасын чыгарып кете албагандары өлкөдөн убактылуу чыгып кетишүүдө.

Жергиликтүү тургундардын айтымдарында, учурда бир айлык норма катары белгиленген биринчи сорттогу 6 килограмм ундун ордуна 5 килограмм ак ун жана 1 килограмм кара ун берилүүдө. Бирок ал дагы биринчи сорттогу ундун баасында — килограммы бир манаттан сатылып жатат.

«Түркмөнстан хроникасынын» белгилешинче, аймактардагы жумушсуздуктун айынан жарандардын көбү бөлүнгөн 6 килограмм унду дагы сатып алууга акча таппай калышууда.

Мамлекеттик дүкөндөргө ун аз санда жана дайыма келип турбагандыктан, адамдар эртелеп эле кезекке тура башташат. Басылманын маалыматына караганда, нан саткан дүкөндөрдүн алдында кезек күткөндөрдүн саны 200дөн ашып кетет. «Алар бир адамга экинден көп эмес нан сатылып жатканына карабастан жетпей калышы мүмкүндүгүн жакшы билишет. Ошондуктан түртүшүүлөр, мушташтар чыгып кетет. Шаарлардагы ири дүкөндөрдөн айырмаланып, полиция кызматкерлери аймактардагы мамлекеттик дүкөндөрдүн алдына нөөмөткө чыгып, тартипке көз салышпайт», — деп жазды басылма.

Адамдар чет өлкөгө чыгуу үчүн чогулткан акыркы акчасын чыгарып, коңшулары же тааныштарынан карызга алып кетишүүдө. Айрымдарына чет өлкөдөгү туугандары жардам берип, акча салып жиберишүүдө.