Түркмөнстан Саламаттык сактоо жана медициналык өнөр жай министрлиги жарандарга президент Гурбынгулы Бердымухамедовдун “Түркмөнстандын дары чөптөрү” китебиндеги чайларды колдонууну сунуштады.

Министрликтин маалымат борбору күз мезгилинде сасык тумоодон оолак болуу үчүн жарандарга “11 пайдалуу кеңеш” берген.

Алардын биринде окурмандарга президент Гурбангулы Бердымухамедовдун китебиндеги ит мурун, жалбыз, ромашка, кызыл мыянын тамыры жана башка чөптөрдөн жасалган чайларды колдонуу сунушталат.

Түркмөн лидери президенттик милдетинен тышкары акыркы он жылда 40тан ашуун китеп чыгарган, өлкөдөгү дары чөптөргө арналган 10 томдугу жарык көргөн. “Чай – дары жана эргүү” деген өзүнчө китеби бар.

Мамлекеттик медиа президенттин чыгармачылыгын ырааттуу түрдө мактап турат.