Жалал-Абад шаарында курулуш тармагында капиталдык салымдарды өздөштүрүү көлөмү улам артып баратат. Шаар мэриясынын жергиликтүү экономикалык өнүгүү бөлүмүнөн билдиришкендей, өткөн жылы тогуз айда шаар боюнча 145 миллион сомдук капиталдык салымдар өздөштүрүлгөн. Быйыл анын көлөмү кыйла жогорулады.

- Быйылкы жылы тогуз ай ичинде курулуш тармагындагы өздөштүрүлгөн капиталдык салымдардын көлөмү 228,3 миллион сомго жетти. Демек, өткөн жылга салыштырмалуу 83,3 миллион сомго көптүк кылат. Бул капиталдык салымдарды өздөштүрүү жагынан өсүү темпи өткөн жылга салыштырмалуу 157,4 пайызга алдыга кетти дегендикти билдирет, - дейт жергиликтүү экономикалык өнүгүү бөлүмүнүн башчысы Салижан Умаров.

Ошого жараша шаарда курулган турак жай аянттары да көп болууда. Мисалы, өткөн жылы тогуз айда 6131 чарчы метр турак жай курулган болсо, быйылкы тогуз айда анын аянты 6997 чарчы метрге жеткен, же өткөн жылга салыштырмалуу 866 чарчы метрге көп болуп, өсүү темпи 114,1 пайызды түзгөн.