АКШ жети орусиялыкты дүйнөнүн ар кайсыл бөлүктөрүндөгү киберчабуулдарды уюштурууга айыптады. Алар Орусиянын аскердик чалгын мекемесинин кызматкерлери экени айтылууда.

АКШнын Юстиция министрлиги айып тагылган орусиялыктардын аты-жөнүн жарыялады. Алардын баары мурда ГРУ деген аталыш менен белгилүү болгон Орусиянын аскердик чалгын мекемесинин кызматкерлери экени айтылууда.

Алар Алексей Моренец, Евгений Серебряков, Иван Ермаков, Артем Малышев, Дмитрий Бадин, Олег Сотников жана Алексей Минин.

Булардын төртөөсү быйыл апрелде Химиялык куралга тыюу салуу уюмунун кеңсесине хакердик чабуул жасоо аракетин көргөндөн кийин Нидерландыдан чыгарылган.

Үчөөсү — Ермаков, Малышев жана Бадин — буга чейин атайын прокурор Роберт Мюллер тарабынан АКШдагы президенттик шайлоого кийлигишүүгө айыпталган.

Орусиялыктар тарабынан жасалган хакердик чабуулдардын арасында Эл аралык антидопинг агенттигинин маалыматтар базасын бузуу, ошондой эле Пенсильваниядагы атомдук электрстанция менен Химиялык куралга тыюу салуу уюмунун кеңсесине чабуул коюу аракеттери көрсөтүлгөн.

Бейшембиде Орусиянын аскердик чалгын мекемесинин дарегине Улуу Британия, Нидерланд жана Канада айыптоолорду айтышты. Улуу Британия менен Нидерланддын премьер-министрлери Орусияны «глобалдык баалуулуктарды жек көрүүгө» айыпташты. Марк Рютте менен Тереза Мэйдин биргелешкен билдирүүсүндө Орусиянын чалгын мекемеси глобалдык коопсуздукту камсыз кылып турган макулдашууларды сыйлабай жатканы жазылган.