Аскер кызматкерлери, Түркмөнстан (архив сүрөт)

Түркмөнстандын Чек ара кызматы менен жөө аскер бөлүктөрүнүн миңдеген жоокерлери Дашөгүз облусуна пахта терүүгө чыгарылды. Бул тууралуу «Азаттыктын» түркмөн кызматы билдирди.

«Суунун тартыштыгынан улам быйыл облуста пахтанын түшүмү өтө эле аз болууда. Бышкан пахтаны ижарачылардын өзүлөрү тез эле терип бүтүп, жаңыларын күтүп калышууда. Бийлик болсо алардан сурабастан эле аскерлерди талаага чыгарып жатат», — деп жазды басылма.

Макалада белгиленгендей, мындан улам дыйкандар кошумча чыгымга учурап жатышат. Анткени мамлекет алардан 1 килограмм пахтаны 1 манаттан гана сатып алат.

«Дыйкан ал сумманын 50 теңгесин айыл-чарба кызматтары, суу жана башка чыгымдар үчүн коротот. Эми аскер кызматкерлерине дагы бир килограмм пахта үчүн 40 теңгеден акча төлөп, аларды тамактандырышы керек болууда», — деп жазды басылма.

1-октябрда укук коргоочулардын эл аралык тобу БУУнун Нью-Йорктогу кеңсесинин алдында нааразылык акциясын өткөрүп, Түркмөнстандын пахта талааларындагы мажбурлап иштетүүлөрдү токтотууну талап кылган.