Жалал-Абад шаарында 21-июнь күнү экинчи жолу Эл аралык бизнес-форум өткөрүлөт. Ага Кытайдан, Россиядан жана Казакстандан инвесторлордун келүүсү күтүлүүдө. Бул тууралуу КР Өкмөтүнүн Жалал-Абад облусундагы  ыйгарым укуктуу өкүлүнүн 1-орун басары Мамасалы Акматов маалымат жыйында билдирди.

Анын берген маалыматына караганда, ушундай эле Эл аралык бизнес-форум өткөн жылы биринчи жолу өткөрүлүп, анда беш багыт боюнча иш жүрүп, бир нече инвестициялык долбоорлорго кол коюлган.

- Өткөн жылдагы бизнес-форумдун жыйынтыктары боюнча Россиянын Чебаксары шаарынын ири заводу биздин ГЭСтерге жабдууларды ташып жатат. Келишимдин негизинде ГЭСтерге 2-3 жабдууну алып келишти. Андан сырткары, былтыркы жылы түзүлгөн келишимдин негизинде Базар-Коргон районуна Кытай инвесторлору көп кабаттуу үйлөрдү куруу боюнча даярдык иштерин жүргүзүп жатышат.Тюмень облусунун шаарларына 2 университетке бюджеттик негизде 30 окууучуга орун берилип, азыркы учурда облустун район-шаарларынан аз камсыз болгон үй-бүлөлөрдүн балдарын жөнөтүү боюнча иштер жүрүп жатат, - дейт М.Акматов.

Өкүлдүн 1-орун басары М.Акматовдун айтымында, быйылкы 2-Эл аралык бизнес форум Өкмөттүн “Айыл-чарба продукцияларын сыртка чыгаруу” боюнча программасынын алкагында айыл-чарба продукцияларын сыртка сатуу максатында өткөрүлүп жатат. Ага негизинен Россиядан кызыктар тараптар чакырылган. Форумга алардын келиши күтүлүүдө. Ошондой эле, КР Өкмөт башчысынын биринчи орун басары М.Абулгазиев өзү келип, бизнес-форумду ачып берүүсү программада каралган. КР Айыл-чарба министри, Кытайдын, Россиянын генералдык консулдары Казакстандын консулу чакырылган. Бул бизнес-форум донорлордун (GIZ, ПРООН, USAID, ОБСЕ) жардамы менен өтүп жатат.

“Дыйкандарга аз да болсо шарт түзөлү деген максатта II - Эл аралык бизнес-форумду өткөрүп жатабыз. Облустун дыйкандары ак мээнети менен өндүргөн продукцияларынын баары, кайра иштетүү ишканаларынын бардыгынын продукциялары жарманкеге коюлат. Бизнес-форумдун ачылуу аземи 21-июнда Жалал-Абад шаарынын “Эркиндик” аянтында саат 10.до башталат. Андан кийин, келген коноктор, бардык шаар тургундары жарманке менен таанышып чыгышат. Ал эми түштөн кийин, Кыргыз-түрк балдар лицейинде тегерек столдор өтүп, анда айыл-чарба продукцияларын кантип өстүрүп, аны кантип сатуу керектиги боюнча маселе талкууга алынат. Акырында, форумдун жыйынтыгы чыгарылып, келишимдерге кол коюлат. Каалоочулар үчүн 21-июнь күнү дыйкандардын чыгарган продукцияларын жарманкеден сатып алууга зор мүмкүнчүлүк түзүлөт”, - дейт М.Акматов.

"Көк-Арт Инфо" Маалымат борбору.