Орусия Коргоо министрлиги Сириянын Алеппо шаарына 48 сааттык жарашуу режимин киргизгенин жарыялады. АКШ мамдепартаментинин өкүлүнүн айтымында, сириялык топтор да согуштук аракеттерди токтотууну жактай тургандыгын билдирген.

Алепподогу элдешүү бейшембиге карган түнү күчүнө кириши керек болчу.

АКШнын мамлекеттик катчысы Жон Керри шаршенбиде Орусия менен Сирия февралда белгиленген жарашуу режимин сакташы керектигин айткан. Ал Кошмо Штаттардын чыдамы түгөнүп баратканын кошумчалаган.

Орусия Алепподогу ракеталык сокку үчүн «Аль-Каида» менен байланышы бар сириялык «Фронт аль-Нусра» тобун күнөөлөдү. Орусиянын авиация күчтөрү Алепподогу согушкерлерге жана көтөрүлүшчү топторго каршы күрөшүүдө сириялык режимдин аскерлерине абадан колдоо көрсөткөн.