Тажикстанда электр энергиясын өчүрүү – убактылуу көрүнүш, кыш мезгилине даярдык көрүү үчүн профилактикалык иштер жүрүүдө. Бул тууралуу «Барки Точик» энергохолдингинен билдиришти.

Буга чейин социалдык түйүндөрдө Тажикстандын аймактарында электр энергиясы өчүрүлүп жатканы маалымдалган. Интернет колдонуучулар жарык эртең менен жана кечкисин гана берилип жатканын жазышып, электр энергиясын колдонууга кайрадан чектөө киргизилеби деп кооптонушкан.

«Эч кандай лимит жөнүндө сөз жок. Учурда «Барки точик» адистери көмөк чордондорду жана башка жабдууларды оңдоп жатышат. Бул профилактика кыш алдында жыл сайын болуп турат. Компания энергия берүү түйүндөрүнүн ишин ишенимдүү жана үзгүлтүксүз камсыздоого тийиш»,- деди энергохолдингдин атайын өкүлү Нозирджон Ёдгори. Анын айтымында, электр кубатын өчүрүү 1-2-октябрга чейин созулат.

Тажикстанда былтыр акыркы 20 жылдан бери биринчи жолу күз-кыш маалында электр кубатын берүүдө чектөө болгон эмес. Анда «Барки точик» энергохолдинги республика боюнча жаңы чакан ГЭСтер жана Жылуулук электр борбору курулганын билдирген. Буга чейин Тажикстан президенти Эмомали Рахмон өлкө жакынкы жылдары электр кубатын чектөө тажрыйбасынан толугу менен баш тартарын айткан.

Тажикстанда дээрлик 20 жыл бою октябрдан апрель айына чейин электр энергиясын колдонууга чектөө киргизилип турган.