Иллюстрациялык сүрөт.

Өкмөткө караштуу Экономикалык кылмыштарга каршы күрөшүү кызматы (Финпол) Чүй облусунун Ысык-Ата районунун аскер комиссарынын орун басары пара менен кармалганын билдирди.

Мекеменин маалыматына караганда, 10-сентябрда жергиликтүү жашоочудан Ысык-Ата райондук аскер комиссариатынын кызматкери ден соолугуна байланыштуу кызмат өтөөгө жараксыз болгон баласын "армияга чакырам" деп коркутуп, 25 миң сом талап кылганын айтып, арыз менен кайрылган.

Финпол чогулткан материалдардын негизинде Аскер прокуратурасы Кылмыш-жаза кодексинин 304 ("Кызматтык абалынан кыянаттык менен пайдалануу"), 313-беренеге ылайык ("Пара талап кылуу") кылмыш ишин козгогон.

12-сентябрда козголгон кылмыш ишинин алкагында Ысык-Ата райондук аскер комиссарынын орун басары пара алып жаткан жеринен кармалганы кабарланды.

"Азаттык" үналгысы.