Азыркы учурда   жарандар банктардан  насыя алып, аны убагында төлөй албай бир топ кыйынчылыктарга туш болууда. Жалал-Абад шаарында да бул көйгөйгө кабылган жарандар шаардык мэриянын кеңешме залында 1-вице мэр Таирбек Чойбековдун катышуусунда жыйын өткөрүштү. Бул тууралуу шаардык мэриянын басма сөз кызматы билдирди.

Алынган маалыматка караганда, аталган жыйынга КР Өкмөтүнүн Жалал-Абад облусундагы ыйгарым укуктуу өкүлчүлүгүнүн 7-июнундагы банктык жана банктык эмес финансылык-кредиттик мекемелердин көйгөйлүү маселелерин чечүү максатында Жалал-Абад  шаардык мэриясынын алдында түзүлгөн комиссиялык курамы,  андан тышкары шаарда иш алып барып жаткан мамлекеттик жана жеке менчик банктардын облустагы жетекчилери жана өкүлдөрү катышты.

Анда  банктардан  үстөк насыя менен карыз алып, аны өз убагында төлөй албай калган жарандар шаардык бийликтен банктар менен кеңешип алган акчаларын төлөө мөөнөттөрүн узартып берүүлөрү боюнча кайрылып келишкен. Шаар тургуну Тамара Жаманкулованын айтымында, азыркы учурда коомдо  банктардан насыя алып аны убагында жашоо шарттарына байланыштуу төлөй албай калган жарандар бир топ.

“Банктардан карыз алууда жана убагында төлөө маселесинин жаралып жатканы бул биринчиден, насыя берүүчү банк менен насыя алуучу жарандын ортосунда түзүлгөн келишим менен толук тааныштыгы жоктугу, үстөк пайыз менен насыя алууда элдердин сабатсыздыгынан болуп жатат. Ошол эле учурда банк тарабынан кетирилген кемчиликтер, бир  банктан карызы бар жаранга экинчи банк аны билип турса да,  үстөк пайызда насыя акча берип жаткандыгында. Анын кесепеттери бүгүнкү күндө  үй-бүлөөлөрдүн ажырашуусуна, жада калса карыздын айынан өз жанын кыйгандар да катталууда”, -  дейт Т. Жаманкулова.

“Жыйынга чогулган шаардык тургундардын көйгөйлөрүн уккан 1-вице мэр жана комиссия курамы мындан ары айтылган маселелер  боюнча комиссиялык курам банктардын жетекчилиги менен сүйлөшүүлөрдү  жүргүзүп, мыйзам чегинде иш алып барып, мүмкүнчүлүктөрдүн болушунча  жардам көрсөтүлөөрүн билдиришти”, - деп маалымдайт мэриянын басма сөз кызматы.