Сирия бийлиги өлкөнүн түндүк-батышындагы Идлиб провинциясында масштабдуу чабуул уюштурууну пландоодо. Бул тууралуу Reuters агенттигинин өз булактары билдирди.

Чабуул качан болору так айтылган эмес. Бирок бир жума мурун Башар Асаддын башкы өнөктөшү – Орусия Сирия менен Жер ортолук деңиз жээктеринде аскер кемелерин жайгаштырууну күчтөндүргөн. Бардыгы болуп эскадрада 10 кеме бар, алардын көбү “Калибр” канаттуу ракеталары менен жабдылган.

Reuters маалымдагандай, Орусия Идлибге Түркия менен бирге чабуул жасоону талкуулоодо. Анкара бул провинциядагы топтордун бир бөлүгүн колдойт. Сүйлөшүүлөргө Иран дагы катышууда.

Идлиб провинциясы – козголоңчулардын акыркы маанилүү таянычы. Орусия тышкы иштер министри Сергей Лавров шаршембиде “Идлибде ириңдеп кеткен жара бар, ал жок кылынышы керек. Биздин батыш өнөктөштөр чагымчылдыкка алдырбайт, антитеррордук операцияны жүргүзүүгө тоскоолдук кылбайт деп үмүттөнөм” деген.

БУУ Идлибге ири кол салуу болсо гуманитардык каатчылык коркунучу жараларын эскерткен. Уюмдун маалыматы боюнча аймакта жүз миңдеген киши жашайт. АКШ Мамлекеттик департаменти да абалга кабатыр экенин билдирген.