Анталия шаарында өткөн жаштардын Эл аралык фестивалына Жалал-Абад шаарындагы “Ариет” балдардын чыгармачылык борборунан 4 кыз барып, катышып келишти. Бул тууралуу аталган борбордун жетекчиси Жыпара Аманкулова билдирди.

Анын айтымында, фестивалга биздин балдар кыргыздын улуттук  үч бийи менен барышты. Алар “Темир комуз”, “Кыз кербез” жана “Кара жорго” бийлерин тартуулашты. Фестивалга жалпысынан 7 мамлекеттен барышты.

- Аталган фестивалга Азия мамлекеттеринин арасынан биздин топ гана катышты.  Бизге таасир калтырган нерсе, элдик каада-салттарды чагылдырган бийлер да болду. Маселен,  орок кармап бийлешти.  Бизде деле 10 жыл мурда “Пахтачы” деген бий бар эле. Биз ойлоп калдык, кийинки жылы ошол бийди даярдап барабыз. Фестивалдын дагы бир өзгөчөлүгү биринчи, экинчи, үчүнчү орун деп бөлгөн жок. Аларда орундарды бөлүштүрүп койсок, балдар достошпой эле карама-каршы болуп калышат деген түшүнүк бар экен. Ошондуктан, фестивалдын катышуучуларынын баарына эле окшош сертификаттарды, белектерди тапшырышты. Анталияга Жалал-Абад шаарынын мэри баш болгон бир топ жетекчилердин колдоосу менен барып келдик, - дейт Ж. Аманкулова.