Николай Патрушев (солдо) менен Жон Болтон (оңдо) Женевада. 23-август 2018-жыл

АКШ президентинин улуттук коопсуздук боюнча кеңешчиси Жон Болтон менен Орусиянын Коопсуздук кеңешинин катчысы Николай Патрушев Женевадагы жолугушуудан кийин биргелешкен билдирүү жасашкан жок.

Болтондун айтымында, жолугушуу маалында ал Орусиянын АКШдагы шайлоого кийлигишкендиги тууралуу маселени көтөргөндүктөн, биргелешкен билдирүү болгон жок.

АКШ президентинин кеңешчиси Вашингтон Орусиянын шайлоолорго мындан кийин дагы кийлигишүүсүнө чыдабай турганын белгиледи. Анын айтымында, Кошмо Штаттар быйыл ноябрда Конгресске өтө турган «орто мөөнөттүк» шайлоонун жыйынтыктарына таасир этүү аракеттерин токтотууга даяр.

Жолугушуу беш саатка созулуп, жабык өттү, журналисттер киргизилген жок. Анда Сириядагы согуш, Ирандын өзөктүк курал маселеси, Украинанын чыгышындагы жаңжал жана АКШнын санкциялары күчүнө кирип жаткан кездеги эки тараптуу мамиле талкууланган.

Жолугушуудан кийин Патрушев эки тараптуу сүйлөшүүлөрдү өткөрүү үчүн башка расмий адамдарды дагы Орусияга чакырганын билдирди. Сүйлөшүү маалында Орусия Коопсуздук кеңешинин катчысы менен Болтондун кийинки жолугушуусу тууралуу макулдашуу жетишилген жок.